2017年9月18日星期一

戇男軼記之二十七【懶得自在】



戇男軼記之二十七【懶得自在】

幾日前買了包特價雞槌,有十三隻。

我和太太都好(選擇性)細食,又唔想將部份急凍,心諗要吃幾多餐至吃得晒?


在當晚,我先用三隻起骨做了雞扒。亦因素知太太喜歡甜酸,於是便煮咗個黑醋甜酸汁,並加熱了這個好好味的鬼佬湯包,然後再用電飯煲做了些菜飯。
*呢餐似乎有好多嘢整,但其實真正煮的都只是那幾塊雞扒。


第二日,下午茶時段,做咗個烤雞槌,係用乜都落啲嘅調味料去醃,焗出來味道OK,甜甜辣辣的又幾好食!
*係好爛好懶嘅煮法

剩低五隻就拆骨起肉,切成雞柳,用慣常方法去醃,都係糖、鹽、水、生抽、蠔油、生粉、紹酒等等。再者,呢五隻雞槌切出來的份量,若以平日計應該可以吃到三餐(這當然是要配上其它菜物)。
*五隻分三餐,咁細食係唔係真㗎?(笑)

但又因近日心情麻麻,好多嘢都唔想做,所以便想到個很hea 嘅煮法,係酒樓吃過的蒸餸飯。

那天晚上,我用了部份雞柳,少許薑碎,一條已切細片的臘腸,與之拌勻,並在飯熟前幾分鐘,便把這些食料放落飯面,待跳掣後,焗多一陣就可以食得。
*呢餐就真係簡單到冇人有!

第二晚,仍是那些雞柳,但冇落臘腸,卻加了煨過蠔油的冬菇,而白飯就換了糙米。
*呢餐基本上只是炆冬菇費些時間!

第三晚,材料跟第二晚一樣,而之前覺得臘腸好味,所以也就加了,亦用回白米飯,但卻在飯熟前我落了隻打開了的鹹蛋。
*呢餐煮得依然好hea,不過,原來加咗鹹蛋,味道會好到差啲停唔到口,嗰一晚我破例我吃咗兩大碗呢!