2016年12月21日星期三

戇男軼記之十【過冬整乜東】













 


戇男軼記之十【過冬整乜東】

昨晚在外吃西餐,我點的《魚、羊、雞三色咖哩》,不錯,但太太叫的那個燉足《16小時豬膀肉》就認真麻麻,份量小,肉質頗乾,仲要叫侍應問廚房才攞到啲肉汁來淋,女兒叫的也是一樣,而且價錢還貴過咖哩兩蚊,要$28一份,所以佢哋兩個齊齊都話冇下次!

吃得不滿意,唯有今晚過冬補數!

只要起得早,冇嘢煮唔到。
切雞又煲湯,搵個盆去裝!

網友靚姐教我整金蠔,本來個心十五十六都唔知整唔整?到最後即今朝六點幾就立刻起身,去冰箱摷番啲珍藏品,有BB仔拳頭咁大嘅日本花菰(大隻到要一開三),和以為係金蠔但都幾大隻嘅蠔豉,咁當然唔少得瑤柱同發菜……

點解話要「搵個盆去裝」?睇下,你話係唔係有啲似盆菜?

浸完白切雞,啲水愛來煲雙骨(豬骨羊骨)湯,又係亂咁湯一種,心諗豬同羊都唔知有冇相沖?都唔理得咁多,加埋少量藥材,茨實,子,淮山,北芪,黨參同龍眼肉。

啱啱煲好,梗係試下先啦,碗頭啖湯好正,嘻!但講開又講,昨日去唐人超市入貨,嘩!乜啲唐人煲湯材料又貴咗,貴到好得人驚,好似黨參咁,以前幾蚊包,而家一小包約100多克就要$18.80,所以第時都係要轉下飲啲素湯好!

又講番琴晚,因為呢幾日係南半球longest days ,即係夏至一樣,日頭長長要到夜晚九點多才天黑,所以趁吃完個餐,還早,係七點五個字,咁咪同老婆行下街街。原來唔使做工又吃完飯,行起街嘅感覺真係零啥唔同,真係好似拍拖!

又再講,自十一月份那次超級地震發生後,我都未落過首都市惠靈頓,誰知後遺症都幾犀利,雖冇乜太多建築物表面受損,但內傷就肯定有,所以昨晚我見到有好多地方都被圍封,話要等結構報告安全才可以從新開啟。

呢段時間起碼要到明年一、二月,而家經濟已唔多好,仲要咁多人冇工做,唉!香港叫雪上加霜,而呢度就係熱上加熱!

報告完畢,謹祝大家

冬至、聖誕、新年快樂,公和廸吉,康祥如意!
 





沒有留言:

發佈留言